Kryeministri i vendit Z.Edi Rama, mblodhi sot në “Shtëpinë e Biznesit”, përfaqësuesit e shoqatës së industrisë prodhuese për tregun e huaj, për të diskutuar mbi nevojat për:

• transfomimin e mëtejshëm të sektorit, në shembullin e kompanive lider në sektor;
• masat mbështetëse që do të ndërmarrim për kapërcimin e sfidave të zhvillimit;
• domosdoshmërinë e të kuptuarit nga të gjithë aktorët e sektorit të faktit se koha e krahut të lirë të punës si avantazh konkurrues ka përfunduar prej disa kohësh tanimë dhe ky fakt përballet vetëm me investime në teknologji e inovacion, e me paga dinjitoze rrjedhimisht.

Z. Elidon AVRAMI, drejtor i përgjithshëm, ishte i pranishëm në këtë takim si përfaqesues i kompanisë DBS Group. U fol konkretisht mbi zhvillimet e kompanisë DBS, në veçanti lidhur me investimet ne teknologji, inovacion dhe kapacitete prodhuese, punësimin dhe rritjen e standarteve të kushteve të punës vit pas viti.  

Në përfundim të takmit, u dakordësua për një seri ndërhyrjesh të cilat do të stimulojnë pikërisht transformimin dhe investimet në teknologji e inovacion, duke mbështetur me shpejtësi nevojën për likuiditet, nevojën për kreditim të lehtësuar, si edhe për burime njerëzore të kualifikuara:

• Rimbursim i shpejtë i TVSH përmes një kanali të dedikuar për kompanitë e kësaj industrie
• Ofrimi i një mekanizmi lehtësues (overdraft) për disponimin e shpejtë të likuiditetit, sipas kontratave me porositësit që kompanitë duhet të fusin në prodhim
• Një garanci sovrane për investime në teknologji dhe inovacion
• Një skemë financimi për ngritjen e një akademie profesionale për manifakturën dhe trajnimet përkatëse në kompani

Qeveria do të rrisë angazhimin e saj për ta mbështetur më tej këtë sektor që të mbyllë vetë ciklet e prodhimit, si dhe të bëhet më produktiv e më konkurrues duke fuqizuar markën “Made in Albania”