DBS Group operon në mënyrë të suksesshme në Shqipëri prej gati 10 vitesh dhe sot është një nga kompanitë më të mëdha tekstile në vend.

Këtë të enjte përmes një ceremonie inaugurimi, me pjesëmarrjen e shumë partnerëve, si përfaqësues të institucioneve qeveritare, trupës diplomatike, përfaqësues të botës akademike universitare, të industrisë shqiptare dhe shoqatave të industrisë dhe eksportit, DBS Group prezantoi një fazë të re të zhvillimit industrial të veshjeve sportive në Shqipëri.

Elidon AVRAMI, drejtor i përgjithshëm, në fjalën e tij tha se projekti DBS Albania është bërë i mundur në partneritet të ngushtë me gjigandin sportiv francez Decathlon dhe partnerë të tjerë strategjikë ndërkombëtarë si brandet Salewa, Crazy Idea, Castelli, Ale’, Karpos, The North Face, Arena etj

Ndërsa Presidenti i Grupit, Gabriele Canton vuri theksin tek punonjësit dhe standardet në punësim, që DBS Group garanton.

 “Po hapim një qendër të proceseve ndihmëse të prodhimit tekstil me sipërfaqe 5600 m2 e cila i shtohet dy fabrikave tona të tjera, në zonën industriale të Tiranës”.

Të gjitha lehtësitë së bashku, e bëjnë DBS Group, kompaninë lider në fushën e prodhimit industrial të veshjeve me rreth 650 punonjës dhe më një sipërfaqe prej 14.500 m2.

Partneriteti strategjik, vëmendja sociale ndaj komunitetit dhe kujdesi ndaj ambientit janë shtyllat kryesore ku bazohet aktiviteti i këtij grupi ndërkombëtar në Shqipëri.